யூதித்தின் பயணம்

யூதித்து நூல் 10ஆம் பிரிவு யூதித்தின் வீட்டிலிருந்து அவர் புறப்பட்டு, பயணம் செய்து, பெத்தூலியாவிற்கு அருகே கூடாரம் அமைத்திருந்த ஒலோபெரினை சந்திப்பது வரை நடந்த அனைத்தையும் வர்ணிக்கிறது.

1. பயணத் தயாரிப்பு

உடல், உணவு என இரண்டு வகை தயாரிப்புக்களில் மும்முரமாயிருக்கின்றார் யூதித்து. தன் கணவர் உயிரோடு இருந்ததுபோல அணிந்த உடைகள், அணிகலன்கள் அனைத்தையும் அணிகிறார். தன் கணவரை விட மேலான கடவுள் உயிரோடு இருக்கிறார் என்று மற்றவர்களுக்கு எடுத்துக்காட்டும் நேரமாக இது இருந்ததால், அதற்கான தயாரிப்பில் எந்தவொரு குற்றவுணர்வும் இல்லாமல் ஈடுபடுகின்றார்.

கணவனை இழந்த பெண்கள் வெள்ளை ஆடை அணிய வேண்டும், பொட்டு வைக்கக் கூடாது, தலைமுடியை சின்னதாக அல்லது மொத்தமாக வெட்டிவிட வேண்டும் என்று நம் மண்ணிலும் மரபு இருந்தது. இந்த மரபை மேலோட்டமாக நோக்கினால் பெண்ணுக்கு தீங்கிழைக்கும் ஒன்றாகத் தெரிகிறது. ஆனால், இதன் பின்புலத்தில் பெண்ணின் பாதுகாப்பே முக்கியமாக இருக்கிறது. அதாவது, ஆண் இல்லாத பெண்ணை நோக்கி மற்ற ஆண்கள் வரலாம் என்பதற்காக, பெண்ணின் கவர்ச்சியை குறைத்துக்காட்ட நம் முன்னோர் எடுத்த தற்காப்பு முயற்சிகளே இவை.

எபிரேய சமூகத்திலும் இந்த மரபுதான் இருந்திருக்கிறது.

தன் மக்களின் மீட்புக்காக மரபை மீறுகின்றார் யூதித்து. சிலம்பு, வளையல், மிதியடி, மோதிரம், காதணி என எல்லாவற்றையும் அணிந்துகொள்கின்றார்.

மேலும், தான் மூன்று நாட்கள் சென்று தங்க வேண்டியிருக்கும். அந்த நேரத்தில் அந்நியர்களின் உணவை உண்டு தன்னைத் தீட்டுப்படுத்திவிடக்கூடாது என்று, தானே உணவும் கொண்டு செல்கின்றார் யூதித்து.

2. பணிப்பெண்

பணிப்பெண் யூதித்துடன் செல்வது எதற்காக? சாட்சிக்காக. 'இருவரின் சாட்சியம் மட்டுமே செல்லும்!' என்பது மோசேயின் சட்டம். மேலும், இருவர் செல்வதாக ஆசிரியர் குறிப்பிடக் காரணம், பகைவர்களால் ஏற்படும் தீங்கை எதிர்கொள்வதற்காகவும் இருக்கலாம். மேலும், யூதித்து பகைவரின் இல்லத்திற்குப் போனாலும், கறைபடாமல் திரும்பி வந்தாள் என்று சாட்சி சொல்வதற்குத்தான் பணிப்பெண் உடன் செல்கிறாள். பணிப்பெண் பயணத்திற்கு துணையாகவும், யூதித்தின் கற்புக்குச் சான்றாகவும் இருக்கிறாள்.

3. வழிவிடுங்க!

யூதித்தின் நகர வாயில்கள் திறந்துவிடப்படுகின்றன. அங்கே நின்றவர்கள் அவரை வாழ்த்தி வழியனுப்புகின்றனர். பகைவரின் வாயில்களையும் தன் வாய்ஜாலத்தால் திறக்க வைக்கின்றார் யூதித்து. மேலும் நகர வாயில்களில் நின்றவர்கள், 'ஆ' என வாய்பிளக்கின்றனர் யூதித்தின் அழகில்.

4. பொய்யா?

யூதித்து பகைவர்களின் வாயில் நுழைவதற்கு சொல்லும் காரணம்: '...நான் ஒலோபெரினைப் பார்த்து அவரிடம் உண்மை நிலையை எடுத்துரைக்க வேண்டும்...அவருக்கு வழியைக் காட்டுவேன்...அவருடைய வீரர்கள் யாரும் உயிரிழக்க மாட்டார்கள்...'

இது யூதித்து சொன்ன பொய்யா? இல்லை.

ஒலோபெரினைப் பார்க்கத்தான் போகின்றார் யூதித்து. மேலும், ஒலோபெரினின் தலையைக் கொய்து தன் வீடு திரும்பும்போது, அவர் அவனுக்கு 'மலைப்பாதையின் வழியைக் காட்டுவார்.' 'அவனுடைய வீரர்கள் யாரும் உயிரிழக்க மாட்டார்கள்!' - ஏனெனில், பயந்துகொண்டு தப்பித்து ஓடி விடுவர். போரிட்டால்தானே உயிரிழக்க!

ஆக, பொய் சொல்வது போல தெரிந்தாலும் யூதித்து சொல்லும் வார்த்தைகள் அனைத்தும் உண்மையே.

5. அழகில் மயங்குதல்

யூதித்தைக் கண்ட பாளையத்து ஆண்கள் அவரின் அழகில் மயங்குகின்றனர். பாளையத்து ஆண்களின் வாய்ச்சொல்லாக, யூதப் பெண்களின் அழகையும், யூத ஆண்களின் பெருமையையும் சொல்லி மகிழ்கின்றார் ஆசிரியர்.

விளக்குகள் அணிவகுக்க யூதித்தைக் காண வருகின்றான் ஒலோபெரின்.

தன் அழகை அவன் முழுமையாகக் கண்டுவிடக் கூடாது என்று அவன்முன் குப்புற விழுகின்றார் யூதித்து.