செம்மண் புனிதர்

இன்றைய (4 பிப்ரவரி 2021) திருநாள்

செம்மண் புனிதர்

இன்று மறவநாட்டு மாணிக்கம், செம்மண் புனிதர் என அன்போடு அழைக்கப்படும் புனித அருளானந்தர் திருநாளைக் கொண்டாடுகிறோம். 

மதுரையிலிருந்து கிழக்கு நோக்கி நாம் எந்தத் திசையில் பயணித்தாலும் இப்புனிதரின் கால்தடங்கள் அங்கே பதிந்திருக்கின்றன என்றும், அவருடைய மூச்சு அந்தக் காற்றில் கலந்திருக்கிறது என்பதையும் நம்மால் உணர முடியும்.

தன் சொந்த நாடு விட்டு வந்து, 'எல்லாருக்கும் எல்லாம் ஆனேன்' என்ற பவுலைப் போல, நம்மவர்க்கு நம்மவராக உடையிலும், உணவுப் பழக்கத்திலும் மாறி, நம்மைத் தன் மறைக்கு மாற்றியவர் இந்தப் புனிதர்.

'கிறிஸ்தவர்களிடமிருந்து என்னைப் பிரித்து, அரசரின் சகோதரராகிய ஓரியூர் தடியத்தேவனிடம் அனுப்பி வைத்தனர். கால தாமதமின்றி என்னைக் கொன்று விடுமாறு அவனுக்கு ரகசிய உத்தரவும் அனுப்பப்பட்டது. இங்கு நான் ஜனவரி 31ம் தேதி வந்து சேர்ந்தேன். பொறுமையின்றி நான் மரணத்தை எதிர் நோக்கி இருக்கின்றேன். அதுவே என்னுடைய லட்சியத்தை நிலை நிறுத்தக் கூடியது. இதுவரை நான் செய்து வந்த வேலைக்குக் கைமாறாக என் உயிரைத் தியாகம் செய்யக்கூடிய பொன்னான சந்தர்ப்பம் இப்போது வந்து விட்டது' (1693 பிப்ரவரி 3) - இவர்தான் அருளானந்தர் எழுதிய இறுதிக் கடிதத்தின் வரிகள்.

இந்தக் கடிதத்தில் உள்ள இரண்டு வார்;த்தைகள் நமக்கும் சவாலாக இருக்கின்றன.

(அ) அதுவே என்னுடைய லட்சியம்

தன் மரணமே தன்னுடைய லட்சியம் என்கிறார் அருளானந்தர். இறப்பிலும் தன் தலைவராகிய கிறிஸ்துவை ஒத்திருக்க விரும்புகிறார் அருளானந்தர். இன்று எனக்கு இலக்கு அல்லது லட்சியத் தெளிவு இருக்கிறதா?

(ஆ) என் வேலைக்குக் கைம்மாறாக வந்துள்ள சந்தர்ப்பம்

தன்னுடைய கொலையை அல்லது மறைசாட்சியத்தை தன் வேலைக்கான கைம்மாறு மற்றும் சந்தர்ப்பம் என்று அழைப்பதன் வழியாக, அதை எதிர்நோக்கியிருந்த அவருடைய மனத்திடம் நமக்கு ஆச்சரியம் தருகிறது.

இன்று மதுரை மற்றும் சிவகங்கை மறைமாவட்டங்கள் தங்களுடைய பாதுகாவலரை நினைத்துக் கொண்டாடுகின்ற வேளையில், மதுரை உயர்மறைமாவட்டம் எங்கள் அன்புப் பேராயரின் ஆயர் திருநிலைப்பாட்டு நாளையும் கொண்டாடுகின்றது. 'அன்பினில் சேவை மலர' என்னும் இலக்கு வாக்கியத்துடன் ஆயர் பணி செய்யும் எம் பாசமிகு பேராயருக்கு வாழ்த்துகளும் இறைவேண்டல்களும்.