சிறியவற்றில்

இன்றைய (10 நவம்பவர் 2018) நற்செய்தி (லூக் 16:9-15)

சிறியவற்றில்

பணஆசைமிக்க பரிசேயரைக் கடிந்துகொள்ளும் இயேசு தன் சீடர்களுக்கு பணம் பற்றிப் போதிக்கின்றார். அவரின் போதனை மூன்று உட்கூறுகளைக் கொண்டிருக்கிறது:

அ. நிலையற்ற செல்வத்தைக் கொண்டு நிலையான நண்பர்களைச் சம்பாதிக்க வேண்டும்.

ஆ. சிறியவற்றில் நம்பிக்கைக்குரியவராய் இருத்தல் வேண்டும்.

இ. ஒரு தலைவருக்கு (கடவுளுக்கு) மட்டும் ஊழியம் செய்ய வேண்டும்.
'நீ எதற்கு அல்லது யாருக்குப் பணிபுரிகிறாயோ நீ அவரோடு நெருக்கமாவாய்' என்பது ஆங்கிலப் பழமொழி.

இம்மூன்றுக்கும் மையமாக இருப்பது 'சிறியவற்றில்' என்ற வார்த்தை.

'சிறியவற்றில் நம்பிக்கை பெரியதிலும் நம்பிக்கை.' 'சிறியதில் நேர்மையற்ற நிலை பெரியதிலும் நேர்மையற்ற நிலை.'

ஆக, செல்வத்திற்கு ஊழியம் செய்வதும்கூட சிறியவற்றில்தான் தொடங்கும். சின்ன சின்ன சமரசங்கள் பெரிய சமரசங்களுக்கு இட்டுச் செல்லும்.

'நான் காலையில் 5 மணிக்கு துயில் எழுவேன்' என்பது நான் எனக்குக் கொடுக்கும் மிகச்சிறிய வாக்குறுதிதான். ஆனால், அந்த வாக்குறுதியை நான் நிறைவேற்றத் தவறும்போது, நான் கொடுக்கும் பெரிய பெரிய வாக்குறுதிகளை நினைத்துக் கேலி செய்யும் என் மனம்.

சின்னஞ்சிறியதில்தான் வாழ்க்கை என்பதை அறிதலே ஞானம்.

இந்த ஞானத்தை புனித பவுல் பெற்றிருப்பதை இன்றைய முதல் வாசகத்தில் பார்க்கிறோம்: 'எந்நிலையிலும் மனநிறைவோடு இருக்கக் கற்றுக்கொண்டுள்ளேன். எனக்கு வறுமையிலும் வாழத் தெரியும். வளமையிலும் வாழத் தெரியும்' என்று பவுல் எப்படிச் சொல்ல முடிகிறது?

அவர் சின்னஞ்சிறியதில் தன் வாழ்வின் மகிழ்வைக் கண்டார்.