நான் அடிமை போன்று

இன்றைய (6 மார்ச் 2021) நற்செய்தி (லூக் 15:1-3,11-32)

நான் அடிமை போன்று

'சொந்த வீட்டிலேயே அடிமையாக இருந்த மூத்த மகனும் தன் தந்தையின் இல்லத்திலிருந்து தூரமாகவே இருந்தான்!'

- இப்படித்தான் தோன்றுகிறது இன்றைய நற்செய்தி வாசகத்தை வாசிக்கும்போது.

தங்கள் வேலையைச் சரியாகச் செய்பவர்கள்,

தனக்கும் தன் தந்தைக்கும் உள்ள உறவைச் சரியாகப் பேணுபவர்கள்,

வாழ்வில் அனைத்தும் அவரவருடைய உழைப்புக்கு ஏற்றாற் போலக் கிடைக்க வேண்டும் என நினைப்பவர்கள்,

அடுத்தவர்களை நீதியுடன் நடத்த விரும்புபவர்கள்,

இவர்கள் யாவரும் பல நேரங்களில் தங்கள் சொந்த வீட்டிலேயே அடிமை போல வாழ்கின்றனர்.

தன் தந்தையின் சொத்துக்களை அழித்த இளைய மகன், இப்போது தன் சொத்தையும் பங்குபோடு வந்துவிட்டான் என்று உள்ளுக்குள் பதறுகிறான் மூத்த மகன்.

ஒருவேளை இவனும் இளைய மகன் போலச் சொத்துகளைப் பிரித்துச் சென்று, தானும் ஊதாரியாகச் செலவழித்துத் திரும்பி வந்தால், தந்தையும் தெருவில் அல்லவா நிற்க வேண்டும்?

இளைய மகனின் வருகையை நாம் கேள்விக்குட்படுத்தவில்லை. அவன் அறிவு தெளிந்தான்.

தந்தையின் இரக்கத்தையும் நாம் கேள்விக்குட்படுத்தவில்லை. அவர் இரக்கம் காட்டினார்.

அது போலவே, மூத்த மகன் மேலும் நமக்குக் கோபம் வேண்டாம். அவன் தன் இயலாமையில், தன் உடன்பிறப்பு, 'உம் மகன்' என்று தள்ளி வைக்கிறான்.

பாவம் அவன்! சொந்த வீட்டிலேயே அடிமையாக வாழ்ந்துவிட்டான்!.

'நல்லது செய்தால் நல்லது நடக்கும்' என்று எண்ணி ஏமாந்துவிட்டான்.

நல்லது செய்தால் நல்லது நடக்கலாம், நடக்காமல் இருக்கலாம்.

நல்லது செய்யாவிட்டாலும் அள்ளி அணைக்கப்படலாம்.

இதை இறை இரக்கம் என்றும் எடுத்துக்கொள்ளலாம். விதி என்றும் எடுத்துக்கொள்ளலாம் (காண். சஉ 9)

மூத்த மகன் நமக்குத் தரும் செய்தி இதுதான்: 'வாழ்வில் மிகவும் நல்லவனாக இருந்தால் நீ சொந்த வீட்டிலேயே அந்நியன் ஆவாய். மேலும், வாழ்க்கையை வெறும் செய்ய வேண்டிய வேலைகள் என நினைத்து வாழாமல் கொஞ்சம் விளையாட்டுத்தனத்தோடும் வாழக் கற்றுக்கொள்!'