அங்கி ஒன்றே போதும்

இன்றைய (3 பிப்ரவரி 2022) நற்செய்தி (மாற் 6:7-13)

அங்கி ஒன்றே போதும்

இன்றைய நற்செய்தி வாசகத்தில் இயேசு தம் பன்னிருவரை, இருவர் இருவராகப் பணிக்கு அனுப்புகின்றார். கைத்தடி தவிர வேறு எதையும் எடுத்துச் செல்வதைத் தடை செய்கின்ற இயேசு, 'அணிந்திருக்கும் அங்கி ஒன்றே போதும்' என்கிறார்.

பாலஸ்தீனம் போன்ற வெப்பமான பகுதிகளில் அதிகமாக வியர்க்கும். உடையில் தூசியும் அழுக்கும் நிறையப் படியும். அப்படி இருந்தாலும் அணிந்திருக்கும் அங்கி ஒன்றே போதும் என்று இயேசு அறிவுறுத்துகின்றார். அணிவதற்கு ஒரே ஆடை இருப்பதால் பணியில் அவசரம் காட்ட வேண்டும் என்பது இயேசுவின் பாடமாக இருக்கிறது. 

நிறைய ஆடைகள் எடுத்துக் கொண்டு சென்று, ஆற, அமரச் செய்யும் பணி அல்ல இறையாட்சிப் பணி. மாறாக, அவசரம் அவசரமாகச் செய்து முடிக்க வேண்டிய பணி. நாளை பார்த்துக்கொள்ளலாம் என்ற தள்ளிப் போடுதல் இல்லை. ஏனெனில், 'நாளை' என்பதே இறையாட்சியில் இல்லை. 'இன்றே இப்பொழுதே இறையாட்சி' அறிவிக்கப்பட வேண்டும்.

இன்றைய முதல் வாசகத்தில், தாவீது தன் மகன் சாலமோனிடம் பேசும் இறுதி வார்த்தைகளைக் கேட்கின்றோம். தாவீதின் இறுதி நாள்கள் இனிமையாக இல்லை. உடலளவில் மிகவும் வலிமை இழக்கின்றார். பத்சேபா தன் வலுவின்மையைப் பயன்படுத்தி சாலமோனை அரசனாக அறிவிக்கச் சொன்னதை நினைத்து உள்ளத்து அளவிலும் வருந்துகின்றார்.

'அனைத்துலகும் போகும் வழியில் நானும் போகிறேன்' என்னும் தாவீதின் சொற்கள் ஞானமிகு சொற்களாக உள்ளன. 

நாம் அனைவரும் இந்த வழியில் போக வேண்டும் என்பதால் இன்றைய நம் வழியைச் சீர்ப்படுத்த வேண்டும் என்று சாலமோனுக்குக் கற்பிக்கின்றார்.