இந்தத் தைலத்தை
'பாஸ்கா விழாவுக்கு ஆறு நாள்களுக்கு' முன் என இன்றைய நற்செய்தி வாசகம் தொடங்குகிறது. 'ஆறு நாள்களுக்கு' முன் என்று தொடங்கும் இன்றைய வாசகத்தில் ஆறு பேரை நாம் சந்திக்கின்றோம்:
(1) இரண்டாம் முறை வாழ வாய்ப்பு பெற்ற இலாசர், (2) மார்த்தா - உணவு பரிமாறுவதில் மும்முரமாய் இருக்கிறார், (3) மரியா - விலையுயர்ந்த தைலத்தால் இயேசுவின் காலடிகளில் பூசுகிறார், (4) யூதாசு - 'மரியாவைத் தடுக்க' நினைத்து தைலத்தை விற்று ஏழைகளுக்குக் கொடுக்க நினைத்தவர், (5) யூதர்கள் - இலாசரைக் காண வந்தவர்கள், காண வந்தவரையே கொலை செய்ய நினைத்தவர்கள், மற்றும் (6) இயேசு - தன் தலைக்கு மேல் வாள் தொங்கினாலும் எதையும் அலட்டிக்கொள்ளாமல் விருந்து உண்பவர்.
இயேசுவுக்கும் யூதாசுக்குமான உரையாடலை இன்று சிந்திப்போம்.
இதற்கு முன் ஒரு சின்ன பின்புலம். நற்செய்தியாளர் யோவானுக்கும் யூதாசுக்கும் இடையே ஏதோ மனக்கசப்பு இருந்ததை அவருடைய நற்செய்தியிலிருந்து ஊகிக்க முடிகிறது. ஏனெனில், யூதாசைப் பற்றிய சாடல் இந்நற்செய்தியில் நிறைய இருக்கும். அதுவும் தேவையற்ற இடங்களில். எடுத்துக்காட்டாக, பிலாத்து இயேசுவிடம், 'உன்னை விடுதலை செய்யவும் சிலுவையில் அறையவும் எனக்கு அதிகாரம் உண்டு என்பது உனக்குத் தெரியாதா?' என்று கேட்கிறார். இயேசு, 'மேலிருந்து அருளப்படாவிடில் உமக்கு என்மேல் எந்த அதிகாரமும் இராது' என்கிறார். இத்தோடு முடித்திருந்தால் பரவாயில்லை. 'என்னை உம்மிடம் ஒப்புவித்தவன்தான் பெரும் பாவம் செய்தவன்' என்கிறார். இந்த இடத்தில் யூதாசைப் பற்றிய குறிப்பு ஏன்?
யூதாசின் ஒழுக்க நெறியை இன்றைய நற்செய்தியில் விமர்சிக்கிறார் யோவான்: 'ஏழைகள்பால் கொண்டிருந்த அக்கறையினால் அல்ல. மாறாக, அவன் ஒரு திருடனாய் இருந்ததால்தான் இப்படிக் கேட்டான். பணப்பை அவனிடம் இருந்தது. அதில் போடப்பட்ட பணத்திலிருந்து அவன் எடுத்துக்கொள்வதுண்டு.' இது தேவையற்ற விமர்சனம் என நினைக்கிறேன். தன்னிடம் பணப்பை கொடுக்கப்படவில்லை என்ற கையாலாகாத நிலையில் இவர் எழுதினாரா, அல்லது தன்னைவிட யூதாசு நம்பிக்கைக்குரியவனாய் இன்னொருத்தன் இருக்கிறான் என்ற பொறாமையில் எழுதினாரா என்று தெரியவில்லை. அல்லது யூதாசு உண்மையிலேயே செய்தாரா என்று தெரியவில்லை. அப்படி எழுதியிருந்தாலும், 'அன்பு,' 'அன்பு' என்று மூச்சுக்கு முந்நூறு தடவை தன் நற்செய்தியிலும், கடிதங்களிலும் குரல் எழுப்பும் யோவான் அன்பின் நிமித்தமாவது இதை நீக்கியிருக்கலாம்.
நிற்க.
இன்றைய நற்செய்தியில் உள்ள வார்த்தைகளை அப்படியே வைத்து நாம் புரிந்துகொள்ள முன்வருவோம்.
'இந்தத் தைலத்தை முந்நூறு தெனாரியத்துக்கு விற்று ஏழைகளுக்கு கொடுக்கலாம்'
இதை யூதாசு செய்த செயலோடு ஒப்பிட்டால்,
'இந்த இயேசுவை முப்பது வெள்ளிக்காசுகளுக்கு விற்று பாவிகளுக்காக அல்லது பாவத்திற்காக கொடுக்கலாம்'
என்று அழகாக பொருந்துகிறது.
ஆகையால்தான், இயேசுவும் உடனடியாக இதில் தன்னை உருவகிப்பதுபோல, 'ஏழைகள்-பாவிகள் என்றும் உங்களோடு இருப்பார்கள். நான் உங்களோடு இருக்கப் போவதில்லை' என்கிறார்.
யூதாசு ஏற்கனவே பணத்தை எடுப்பவனாகவும், இன்று கடவுளையே எடுப்பவனாகவும் இருக்கிறார்.
'எடுப்பவர்கள்' எப்போதும் ஆபத்தானவர்கள்.
இன்றைய நற்செய்தியில் மார்த்தா விருந்து 'கொடுக்கிறார்,' மரியா தைலம் 'கொடுக்கிறார்,' இயேசு இலாசருக்கு உயிர் 'கொடுக்கிறார்.' ஆனால், யூதாசு பணத்தை 'எடுக்கிறார்,' யூதர்கள் இலாசரின் உயிரை 'எடுக்கின்றனர்.'
எடுப்பவர்களைப் பொறுத்தவரையில் வாழ்க்கையில் எல்லாவற்றிற்கும் ஒரு விலைக்குறிப்பு உண்டு. எல்லாவற்றையும் இவர்கள் இக்கண்கள் கொண்டே பார்ப்பார்கள். பார்ப்பதோடல்லாமல் அதை அப்படியே அவர்கள் தங்களுக்கென ஆக்கிக்கொள்ளவும் நினைப்பார்கள்
நம் வாழ்க்கையை 'தைலம்' என வைத்துக் கொள்வோம். அது எப்படி இருக்க வேண்டும்? கடவுளின் காலடியில் ஊற்றப்பட்டு வீடு முழுவதும் மணம் தருவதாக இருக்க வேண்டும். ஆனால், பல நேரங்களில் யூதாசு போல நாம் அதைக் கணக்கிட்டு கணக்கிட்டு வாழ்கிறோம். அவ்வகை மனநிலை நம் ஏழ்மை நிலையை - வெறுமை நிலையை - அதிகரித்துவிடும். ஆகையால், 'ஏழைகள் என்றும் உங்களோடு இருப்பார்கள்.'
இந்தத் தைலம் - அது இயேசுவாக இருந்தாலும், நம் வாழ்வாக இருந்தாலும் - விற்கப்படுவது தவறு!
பாஸ்கா விழாவுக்கு ஆறு நாட்களுக்கு முன் வரும் இன்றைய வாசகத்தில் ஆறு பேரை சந்தித்தாலும், அதில் குறிப்பிடத்தக்கவர்கள் இயேசுவும்,யூதாசும் மட்டுமே! இதில் யூதாசு குறித்த எதிர்மறையான விஷயங்களில் சிலவற்றையேனும் நற்செய்தியாளர் தவிர்த்திருக்கலாம் என்கிறார் தந்தை. தவிர்த்திருக்கலாம் தான்…ஆனால் தைலம் குறித்த முந்நூறு தெனாரியமும்,இயேசுவைக்குறித்த முப்பது வெள்ளிக்காசுகளும் ஒரே கோட்டில் இருந்ததால் யோவானுக்கு அது ஒரு நெருடலாக இருந்திருக்கலாம்.எடுத்தே பழக்கப்பட்ட யூதாசு, இயேசுவை எடுக்க நினைத்தில் ஆச்சரியமில்லை. ‘ கொடுக்கும்’ வரிசையில் இயேசு,மார்த்தா,மரியா என்றால் எடுக்கும் வரிசையில் யூதாசும்,யூதர்களும்!
ReplyDelete‘பணம் பாதாளம் வரை பாயும்’ என்று தெரிந்தவனுக்கு,அதைத் தனக்கென ஆக்கிக்கொள்ளும் வித்தையும் தெரிந்திருந்ததில் ஆச்சரியமில்லை.
நம் வாழ்க்கை எனும் தைலத்தை நாம் என்ன செய்கிறோம்?! அது இயேசுவின் காலடிகளுக்கு மட்டுமல்ல…தேவையிலிருப்போர் அனைவரின் காலடிகளையும் நனைத்து, மணம் பரப்ப வேண்டும். ஏழ்மை…வெறுமை எல்லாம் பலநேரங்களில் யாரோ சம்பாதிக்க வெறும் பேசுபொருளாகத்தான் பார்க்கப்படுகிறது. அவை போற்றப்பட வேண்டிய விஷயங்களும் கூட என்ற எண்ணம் நம்மில் உதிக்கும் போது மட்டுமே நாம் நம் வாழ்க்கையையும்…ஏன் இயேசுவையும் கூட விற்க முன்வரமாட்டோம்.
நம்மோடு இருக்கும் ஏழைகளை ‘நாமாகவே’ பார்க்கச் சொல்லும் ஒரு பதிவும் கூட..தந்தைக்கு நன்றிகள்!!!
very meaningful reflections... Thank you
ReplyDelete