இருவரில் ஒருவர்

இன்றைய (13 நவம்பர் 2020) நற்செய்தி (லூக் 17:26-37)

இருவரில் ஒருவர்

மானிட மகனுடைய காலத்தில், அல்லது அவருடைய இரண்டாம் வருகையின்போது, அல்லது உலக முடிவில், அல்லது இறுதித் தீர்ப்பின் போது நடக்கும் நிகழ்வுகள் பற்றித் தம் சீடர்களோடு பகிர்ந்துகொள்கிறார் இயேசு. 

இந்த நற்செய்திப் பகுதியில் இயேசு ஐந்து உருவகங்கள் அல்லது ஒப்புமைகளைப் பயன்படுத்துகின்றார்:

1. நோவாவின் காலம்

வாழ்க்கை இயல்பாக இருந்தது. ஆனால், திடீரென அவர்கள் வாழ்க்கை ஒருநாள் முடிந்துவிட்டது.

2. லோத்து சோதோமை விட்டுப் போன நாள்

எல்லாரையும் அழித்தது. லோத்து குடும்பம் தப்பியது. ஆனால், அழிவைத் திரும்பிப் பார்த்த லோத்தின் மனைவி உப்புச் சிலையாக மாறுகின்றார்.

3. ஒரே கட்டிலில் இருவர் படுத்திருப்பர். ஒருவர் எடுக்கப்படுவார். மற்றவர் விடப்படுவார்.

இரண்டு பேர் ஓய்ந்திருக்கின்றனர். ஓய்ந்திருப்பவர்களில் ஒருவர் எடுத்துக்கொள்ளப்படுகிறார். மற்றவர் விடப்படுகிறார்.

4. இருவர் மாவரைப்பர். ஒருவர் எடுக்கப்படுவார். மற்றவர் விடப்படுவார்.

இரண்டு பேர் பணிசெய்துகொண்டிருப்பர். அவர்களில் ஒருவர் எடுத்துக்கொள்ளப்படுகிறார். மற்றவர் விடப்படுகிறார்.

5. எங்கே நிகழும்? 'பிணம் எங்கேயோ கழுகுகளும் அங்கேயே!'

அதாவது, எங்கு எது நடக்குமோ அங்கு அது நடக்கும்.

மேற்காணும் உருவகங்கள் நமக்கு மூன்று விடயங்களைச் சொல்கின்றன:

அ. அந்த நாள் எப்போது என்பதை நாம் அறிந்துகொள்ள இயலாது.

ஆ. அந்த நாளின் நிகழ்வுகளை நாம் நிர்ணயிக்க முடியாது.

இ. அந்த நாளில் வாழ்க்கை இயல்பாகச் சென்றுகொண்டிருக்கும்.

அந்த நாளை எப்படி எதிர்கொள்வது?

முதல் வாசகத்தில் (காண். 2 யோவா 4-9) இக்கேள்விக்கான விடையைத் தருகிறார்:

'ஒருவர் மற்றவரிடம் அன்பு செலுத்துவோம்' - அந்நாள் வரை!