புனித பிலிப்பு மற்றும் சிறிய யாக்கோபு
இன்று நம் தாய்த் திருஅவை புனித பிலிப்பு மற்றும் புனித சிறிய யாக்கோபு என்னும் இரு திருத்தூதர்களின் திருநாளைக் கொண்டாடி மகிழ்கிறது.
புனித பிலிப்பு கிரேக்க, சிரியா, மற்றும் ஃபிர்கியா நாடுகளில் மறைபரப்பு பணி செய்ததாக பாரம்பரியம் குறிப்பிடுகின்றது. யோவான் நற்செய்தியில் பிலிப்பு அழைக்கப்படும் நிகழ்வு பதிவு செய்யப்பட்டுள்ளது. இவருடைய சொந்த ஊர் பெத்சாய்தா. அந்திரேயா மற்றும் பேதுருவும் இதே ஊரைச் சார்ந்தவர்கள் என யோவான் தொடர்பை ஏற்படுத்துகின்றார். திருமுழுக்கு யோவான் இயேசுவைச் சுட்டிக்காட்டி, 'இதோ கடவுளின் ஆட்டுக்குட்டி!' என்று சொல்லும் நிகழ்வில் பிலிப்பு திருமுழுக்கு யோவானின் சீடராக இருக்கின்றார். நத்தனியேல் என அழைக்கப்படும் பார்த்தலோமேயுவை இயேசுவிடம் அழைத்து வந்தவர் பிலிப்பு. ஐயாயிரம் பேருக்கு எப்படி உணவு அளிப்பது என்ற கேள்வியை இயேசுவிடம் கேட்பவரும், நம்மிடம் இரண்டு அப்பங்கள் மட்டுமே உள்ளன என்று சொன்னவரும் பிலிப்பே. மேலும், இயேசுவைக் காண விரும்பிய கிரேக்கர்களை அந்திரேயாவிடம் அழைத்துச் சென்றவர் இவரே (காண். யோவா 12:21). மேலும், இறுதி இராவுணவில், 'தந்தையை எங்களுக்குக் காட்டும். அதுவே போதும்!' என்று இயேசுவிடம் சொன்னவர் பிலிப்பு. ஆக, யோவான் நற்செய்தியில் பிலிப்பு ஒரு முதன்மையான கதைமாந்தராக விளங்குகின்றார்.
'பிலிப்புவின் நற்செய்தி' என்ற ஒரு நூல் தொல்பொருள் ஆராய்ச்சியில் கிடைக்கப்பெற்றுள்ளது. மேலும், 'பிலிப்புவுக்கு பேதுரு எழுதிய கடிதம்' என்னும் ஏற்றுக்கொள்ளப்படாத நூலில், திருத்தூதர்கள் அனைவருடனும் வந்து இணைந்துகொள்ளுமாறு ஒலிவ மலைக்கு வாரும் என்று பேதுரு பிலிப்புவுக்கு எழுதுகிறார். இயேசுவின் உயிர்ப்புக்குப் பின்னர் பிலிப்பு தானாக மறைபரப்புப் பணியைத் தொடங்கியிருக்கிறார். இந்த நேரத்தில் பேதுரு அவரைத் திரும்ப அழைப்பது போல இருக்கிறது இக்கடிதம். 'பிலிப்புவின் பணிகள்' என்னும் இன்னொரு நூலில் பிலிப்பு ஆற்றிய பணிகள் கொடுக்கப்பட்டுள்ளன. பிலிப்பு சிலுவையில் அறையப்பட்டு இறந்தார் என ஒரு மரபும், அவர் தலை வெட்டுண்டு இறந்தார் என இன்னொரு மரபும் சொல்கின்றன.
நாம் இலத்தீன் திருஅவையில் பயன்படுத்தும் சிலுவையை வடிவமைத்தவர் பிலிப்பு. பிலிப்பு கையில் ஏந்தியிருக்கும் சிலுவையில், இரண்டு அப்பங்களையும் உருவங்களாக சில இடங்களில் வரையப்பட்டுள்ளன.
புனித சின்ன யாக்கோபு என்பவர் பெரிய யாக்கோபிலிருந்து வித்தியாசப்படுத்துவதற்காக அவ்வாறு அழைக்கப்படுகின்றார். பெரிய யாக்கோபுவை செபதேயுவின் மகன் என்றும், சின்ன யாக்கோபுவை அல்பேயுவின் மகன் என்றும் நற்செய்தி நூல்கள் அழைக்கின்றனர். அல்பேயுவின் மகன் யாக்கோபு என்னும் சின்ன யாக்கோபை, 'இயேசுவின் சகோதரர்' என அடையாளப்படுத்துகின்றார் புனித ஜெரோம். இவரை மத்தேயுவின் சகோதரர் என்றும் சிலர் அழைப்பதுண்டு. ஏனெனில், மத்தேயுவின் தந்தை பெயரும் அல்பேயு என வழங்கப்பட்டுள்ளது (காண். மாற் 2:14, 3:18)
இன்று நாம் கொண்டாடும் புனிதர்கள் நமக்குத் தரும் பாடங்கள் எவை?
(அ) திருத்தூதர்கள் இயேசுவையும் நம்மையும் இணைக்கும் பாலங்கள். இயேசுவை நாம் இவர்கள் கண்கள் வழியாகவே பார்க்கின்றோம், இவர்களின் கரங்கள் வழியாகவே தொடுகின்றோம். நமக்குப் பின் வரும் நம் தலைமுறைகளுக்கு நம் வழியாக பாலங்கள் நீள்கின்றன. நாமும் திருத்தூதர்களின் நம்பிக்கையின் நீட்சிகளே.
(ஆ) உரையாடும் பிலிப்பு. பிலிப்பு எதார்த்தமாகப் பேசுபவராகவும், தன் பேச்சுக்கலையால் பலரின் நல்லெண்ணத்தை வென்றவராகவும் நமக்குத் தெரிகிறார். உரையாடல் என்பது ஒரு கலை. குறைவாகப் பேசி, நிறைவாகக் கேட்பவரே உரையாடலில் சிறக்க முடியும். இன்று நாம் ஒருவர் மற்றவருடன் உரையாட பிலிப்பு நம்மைத் தூண்டுகிறார்.
(இ) திரும்பாத திடம். திருத்தூதர்கள் தங்களின் நம்பிக்கைக்காக, தாங்கள் பெற்ற இயேசு அனுபவத்திற்காக உயிர் துறக்கவும் துணிகின்றனர். ஒருபோதும் தங்களின் முந்தைய வாழ்க்கை நோக்கித் திரும்பவில்லை அவர்கள். நம்பிக்கைப் பயணத்திலும், இறையழைத்தல் பயணத்திலும் திரும்பாத திடம் நல்லது.
விழா நாயகர்கள் புனித பிலிப்பு மற்றும் சிறிய யாக்கோபு பற்றிய தெரிந்த மற்றும் தெரியாத விஷயங்களை நமக்குச் சொல்லும் ஒரு பதிவு.
ReplyDeleteதிருத்தூதர்கள் இயேசுவையும்,நம்மையும் இணைக்கும் பாலங்கள் என்பதும், இந்தப்பாலங்கள் நம் தலைமுறைகளுக்கு நம் வழியாகவே நீள்கின்றன என்பதும் நாம் பெருமை கொள்ள வேண்டிய விஷயம். குறைவாப்பேசி நிறைவாகக் கேட்கும் கலையை இவரிடமிருந்து நாம் பெற்றுக்கொண்டால் நலம்! நம்பிக்கைப் பயணத்திலும்,இறையழைத்தல் பயணத்திலும் மட்டுமல்ல..... நாம் எடுத்த எந்தவொரு நல்ல விஷயத்திலும் முன் வைத்த காலைப் பின் வைக்கக் கூடாது எனும் கொள்கையில் நமக்குப் பிடிப்பு இருப்பது நலம்.” கலப்பையைத் தொட்டவன் திரும்பிப் பார்த்தல் ஆகாது” என்பது தந்தை அடிக்கடி உதிர்க்கும் விஷயம். ஒவ்வொருவர் வாழ்க்கையிலும் இந்தக் கொள்கைப் பிடிப்பைக் கடைபிடித்தல் நலம்! இன்று நாம் விழாக்காணும் நாயகர்கள் நம்மை இயேசுவின் அருகாமைக்கு இட்டுச் செல்வார்களாக! இவர்களைப் பற்றிய தெரியாத பல விஷயங்களைத் தோண்டியெடுத்து தந்த தந்தைக்கு நன்றிகள்!!!
ஆமென்!
ReplyDelete