நீதிமொழிகள் - 21

'கர்ணன்' திரைப்படத்தில் ஒரு காட்சி உண்டு.

தகுந்த வேளையில் பலி கொடுப்பவர்களே போரில் வெல்வார்கள் என்று துரியோதனனுக்குச் சொல்லப்படும்.

சாஸ்திரங்கள் கற்றறிந்த பாண்டவர்களின் இளைய சகோதரன் சகாதேவனை நாடி வருவார் துரியோதனன். 'பலி கொடுப்பதற்கு தகுந்த நேரம் எது?' என்று அவர் கேட்க, இவரும் நேரம் குறித்துக் கொடுத்துவிடுவார்.

இப்படி பலி கொடுத்துவிட்டால் நிச்சயம் துரியோதனன் வெற்றி பெறுவார் என்ற கேள்விப்பட்ட பாண்டவர்கள், குறிப்பாக பீமன், சகாதேவன் மேல் கோபம் கொள்வார்கள்.

'இந்தத் தவற்றிலிருந்து எங்களைக் காப்பாற்றுங்கள்!' என்று பாண்டவர்களும், பாஞ்சாலியும் கண்ணனிடம் (கிருஷ்ணா) புலம்புவார்கள்.

அப்பொழுது கண்ணன் (கிருஷ்ண பரமாத்மா) சொல்வார்:

'உங்களின் எல்லாருடைய முட்டாள்தனத்திற்கும் ஈடுகொடுக்க நான் ஒருவன் கிடைத்துவிட்டேன்!'

நிற்க.

'மனிதர் தம் மடைமையாலேயே வாழ்க்கையைக் கெடுத்துக் கொள்வர். ஆனால் அவர்கள் ஆண்டவர்மீது சினங்கொண்டு குமுறுவர்' (நீமொ 19:2) என்கிறார் நீமொ ஆசிரியர்.