தாம் விரும்பியவர்களை

நாளைய (19 சனவரி 2018) நற்செய்தி (மாற்கு 3:13-19)

தாம் விரும்பியவர்களை

'இயேசு மலைமேல் ஏறித் தாம் விரும்பியவர்களைத் தம்மிடம் வரவழைத்தார்.
அவர்களும் அவரிடம் வந்தார்கள்.'

நாளைய நற்செய்தியில் நாம் வாசிக்கும் தொடக்கவரிகள் இவை. இயேசு பன்னிருவரை அழைக்கும் நிகழ்வில் அதிகமாக கண்டுகொள்ளாமல் விடப்படும் வரிகள் இவை.

சீடர்களை அழைக்குமுன் இயேசு மலைமேல் ஏறுகின்றார். 'மலைமேல் ஏறுதல்' என்பது இயேசுவைப் பொறுத்த வரையில் 'தனிமையில் இருத்தல்,' 'செபித்தல்,' 'தந்தையோடு ஒன்றித்திருத்தல்.' மேலும், உருவகமாகப் பார்த்தோமென்றால் மலைமேல் ஏறும்போது ஒருவரின் பார்வை விசாலப்படுகிறது. நாம் கீழே நின்று மற்றவர்களைப் பார்ப்பதற்கும், மொட்டை மாடியில் நின்று பார்ப்பதற்கும் வித்தியாசம் இருக்கத்தானே செய்கிறது. கீழிருந்து பார்க்கும்போது ஒருவரின் பகுதிதான் தெரிகின்றது. ஆனால் மேலிருந்து பார்க்கும்போது ஏறக்குறைய முழுவதும் தெரிகிறது.

இயேசுவின் அழைப்பு இரண்டு நிலைகளில் இருக்கின்றது: 'அவர் அழைக்கின்றார்.' 'அவர்கள் வருகிறார்கள்.' ஆக, அழைப்பும், பதில் தருதலும் அடுத்தடுத்த தொடர்நிகழ்வாக இருக்கிறது. இயேசுவின் அழைப்பிற்கு யாரும் 'இல்லை' என்ற பதில் தராதது ஆச்சர்யமாக இருக்கிறது. ஏன் அவர்கள் 'இல்லை' என்று சொல்லவில்லை? இயேசுவின் அழைப்பிற்காக தவம் கிடந்ததுபோல உடனே 'ஆம்' என்று அவர்பின் வந்துவிடுகின்றனர்.

இயேசு 'தாம் விரும்பியவர்களை' அழைக்கின்றார்.

இறையழைப்பிற்கான ஒரே தகுதி இதுதான்: 'அவரின் விருப்பம்.'

'அருள்பணியாளராக இருந்து என்ன சாதித்தோம்?' என்று ஒருநாள் அருள்தந்தை விமி சார்லி அவர்களைக் கேட்டேன்.
'அருள்பணியாளராக இருப்பதே சாதனைதான்' என்று புன்முறுவலோடு சொன்னார்.

அதாவது, அவரின் கண்கள் நம்மேல் படுவதுதான் அழைத்தல்.

இந்த அழைப்பிற்காக ஒருவர் கொடுக்க வேண்டிய விலை மிக அதிகம். அழைக்கப்பட்ட 12 பேரும் - யூதாசு உட்பட - மிகக் கொடூரமான முறையில் தங்கள் உயிரைக் கையளிக்கின்றனர். இந்த விலை தெரிந்துதான் இவர்கள் முன்வந்தார்களா? என்பது அடுத்த ஆச்சர்யம்.

நாளைய தினம் அவரின் அழைத்தலுக்கு 'ஆம்' என்று சொன்ன அனைத்து அருள்நிலை இனியவர்களுக்காகவும் வேண்டுவோம்.

அதே வேளையில், அவரின் பணிக்கான அழைப்பு இன்று அரிதாகிவரும் காலத்தில் அவரின் குரலைக் கேட்கின்ற, அந்தக் குரலுக்கு பதில் தருகின்ற நிறைய இளவல்கள் தூண்டப்படவேண்டும் எனவும் மன்றாடுவோம்.